ID: Lista kazni za kršenje šerijata: Smrt, odsijecanje ruke, noge…

Džihadistička organizacija Islamska država (IS) objavila je listu teških kazni za kršenje islamskog zakona – šerijata, od 80 udaraca bičem za konzumiranje alkohola, preko odsijecanja ruke i noge zbog krađe, do smrti za bogohuljenje i preljubu, ali i homoseksualnost i “špijunažu u ime nevjernika”.

Kodeks ponašanja koji šerijat podrazumijeva biće stavljen na snagu u oblastima koje su pod kontrolom IS, a koje sada obuhvataju velike djelove Iraka i Sirije, prenosi britanski Daily Mail.

Onaj (ili ona) koji počini preljubu biće kamenovan do smrti ukoliko je u braku, ili će dobiti 100 udaraca bičem i protjeran ukoliko nije u braku.

Smrtna kazna je predviđena i za one koji se odaju sodomiji, odnosno homoseksualnosti, kao i za one koji “špijuniraju u korist nevjernika”.

Razbojnicima sleduje odsijecanje desne ruke i lijeve noge, dok one koji terorišu ljude čeka – izgnanstvo.

Čarli Vinter, istraživač pri nevladinoj organizaciji “Kuilijam”, koja se bavi antiekstremizmom, kaže da je ovaj dokument, po svoj prilici, autentičan.

Prema njegovim riječima, listu sa kaznama je 16. decembra objavio ogranak IS u Alepu.

IS je prošle nedjelje objavila fotografije raspeća dvojice muškaraca koji su optuženi za razbojništvo, kao i jedne žene koja je kamenovana do smrti, navodno zbog preljube, podsjeća britanski list.

Ova teroristička grupa je objavila video snimak dvojice muškaraca koji su bačeni sa vrha jedne visoke zgrade u Raki, u Siriji, zbog toga što su homoseksualci.

Jedan maskirani borac IS objavio je optužbe protiv njih da su koristili mali ručni radio, a potom ih proglasio krivim za učešće u homoseksualnim aktivnostima.

On je rekao da bi ih trebalo kazniti smrću, u skladu sa radikalnim tumačenjem šerijata koje zagovara IS.

Dvojica muškaraca su zatim vezana i stavljen im je povez na oči, a potom su gurnuti sa zgrade visoke 30 metara.

Navodno su militantni aktivisti IS ubili ove nedjelje troje od najmanje 15 odgajivača golubova u Iraku nakon što je zaključeno da je odgajanje ptica protivno islamskoj vjeri. 

Ekstremisti su, takođe, prošle nedjelje pogubili 13 tinejdžera zbog toga što su gledali fudbalsku utakmicu Svjetskog prvenstva Azije zmeđu Irana i Jordana.

Mladi fudbalski navijači su “uhvaćeni na djelu” dok su gledali utakmicu na televiziji u iračkom gradu Mosulu, koji kontroliše IS, navodi Daily Mail.

Tinejdžeri su okupljeni i strijeljani, saopštila je grupa koja se bori protiv IS pod nazivom “Tihi pokolj nad Rakom”.

Pojavili su se i snimci na kojima ženu u crnoj burki do smrti kamenuje veliki broj boraca IS.

U centru Mosula su nedavno ubijena i četiri ljekara, navodno zbog toga što su odbili da liječe pripadnike IS.

Džihadistička organizacija je, navodno, pogubila i 15 civila pred masom ljudi u Faludži 2. januara, pod sumnjom da su sarađivali sa iračkim bezbjednosnim snagama, a još 14 su ubili na javnom trgu u Duru, sjeverno od Tikrita, zato što su odbili da obećaju lojalnost IS, zaključuje britanski list