NI TRAGA NI GLASA PERU MARTINOVIĆU: Policija nema informacije

Ni nakon tri mjeseca, policija i porodica nemaju trag koji bi riješio tajnu misterioznog nestanka Pera Martinovića(86) iz Kruta kod Ulcinja.

Starac, koji je živio sam, nestao je 19. maja u jutarnjim satima kada je izašao iz svog doma i ostavio uključen teloevizor a ključeve na ulaznim vratima sa spoljne strane. Zajedno sa starcem, nestao je i njegov pas Džeki, koji se poslije sedam dana kući vratio bez gazde.

Martinovićev sin Pavle kaže da je porodica pretražila cijelu okolinu i brdo Možuru, kuda je starac ponekad šetao.

“Svaku vrtaču i bunar smo pretražili ali ništa”, kazao je on juče Vijestima.

On vjeruje da je njegov otac na sebi imao teget jaknu koju je često nosio u posljednje vrijeme i koje nema kući.

“Ne možemo ni da pretpostavimo gdje je i šta mu se desilo. Samo Bog zna”, kazao je Pavle.

Slučaj nestanka osamdesetogodišnjaka prijavljen je ulcinjskoj policiji, koja još uvijek nema informacije o Martinoviću.