Izet Mujević, Senad Mujević i Semir Hodžić uhapšeni su juče zbog pucnjave koja se dogodila u subotu veče oko 19 časova u Industrijskoj zoni “Zeleni“ u Rožajama. Za Alisom Hodžićem za kojeg se sumnja da je učestvovao u pucnjavi policija traga.

Iz policije su saopštili da se Izet Mujević, koji je u pucnjavi ranjen u stomak, nalazi pod nadzorom u Opštoj bolnici u Beranama.

Kako je Pobjedi saopšteno, do incidenta je došlo nakon žučne rasprave Mujevića i njegovih sestrića Semira i Alisa Hodžića, u centru Rožaja. Nakon svađe zbog dugogodišnjih neraščišćenih računa, Mujević je pozvao sestriće da dođu kod betonjerke koju drže braća Hodžić na Zelenima, gdje je, kako se sumnja, pucao na sestriće.

Nakon toga, jedan od braće je uzvratio pucnjavom, a cijeli incident je zabilježila sigurnosna kamera na objektu braće Hodžić. Prema operativnim saznanjima kojima policija raspolaže, Mujević je prvi potegao vatreno oružje nakon čega je Semir Hodžić uzvratio pucnjevima, dok je Alis pokušavao da spriječi brata da ne ubije ujaka.

Semir Hodžić se odmah nakon incidenta predao policiji.

Pobjeda