PRIČA O HUMANOSTI IZ BERANA: Pronašao novčanik sa 190 eura i vratio ga vlasniku
Beranci Janko Babović i Vladimir Đurišić od juče su prijatelji. Do juče nijesu se ni poznavali. Prijateljstvu je kažu „kumovao“ novčanik koji je Vladimir izgubio.
Našao ga je Janko i odnio u lokalni radio.
– U ponedjeljak rano ujuro ispred gradske apoteke pronašao sam novčanik sa 190 eura i odnio ga u radio. Otišao sam u obližnji kafe-bar. Primijetio sam mladića kako ide ka apeteci i zagleduje oko sebe. Prišao sam mu i pitao ga šta radi? Rekao sam mu da sam ja pronašao petsto eura. On je iskreno odgovorio da je izgubio novac, ali ne toliko – ispričao je Babović. Objašnjava da je rekao netačan iznos novca kako bi ,,iskušao Vladimira“.
– Nisam poznavao čovjeka, morao sam ga iskušati – ispričao je kroz osmijeh. Ispostavilo se da mladić kojeg je iskušavao jeste vlasnik novčanika, rudar je beranskog Rudnika uglja i toga dana je primio platu. – Primio sam platu i otišao da uplatim neke račune.
Ono što mi je ostalo, držao sam u zadnjem džepu pantalona. Kako je ispalo ne znam, ali naravno da sam se isjekirao. A kada sam se vratio istim putem, prijatno sam se iznenadio kada me je zaustavio moj sugrađanin koji je pronašao novac – ispričao je Đurišić.
Babović mu je kazao da je novčanik odnio u radio, potom su zajedno otišli i završili priču.
– Neću da krijem da sam bio i malo očajan. To možda nije nekom veliki novac, ali je meni sve i zarađujem ga teškim poslom u jami Rudnika uglja – kazao je Vladimir. Iskreno je dodao kako ga je ,,Janko svojim gestom uvjerio da još ima poštenih ljudi i da mu je vratio osmijeh na lice“. S adruge strane, Janko je dodao da nije imako dilemu kako da postupi.
– Ni jednog trenutka nisam razmišljao.
Nisam znao što da radim jer nije bilo dokumenata, samo svježanj novčanica. Na kraju je ispalo sve dobro, a posebno mi je drago kada sam saznao da se radi o rudaru i nekom ko novac pošteno i teško zarađuje – kazao je Janko. Nakon što su ispričali priču, zajedno su napustili radio. Vladimir je dobio novac, a Janko prijatelja.
(Pobjeda)