UZ PRISUSTVO TRAMPA: Potpisan sporazum Kosova i Srbije
Predsjednik Srbije Aleksandar Vučić i premijer Kosova Avdulah Hoti potpisali su danas u Vašingtonu sporazum o ekonomskoj normalizaciji odnosa Beograda i Prištine.
Lideri Srbije i Kosova sporazum su potpisali sa predsjednikom SAD Donaldom Trampom u Ovalnom kabinetu u Bijeloj kući.
Poslije potpisivanja sporazuma, Tramp će razgovarati odvojeno s Vučićem i s Hotijem.
Na instagram profilu predsjednika Srbije objavljeno je nekoliko fotografija uz poruku: “Posljednja provjera pred potpisivanje”, na kojima se vidi i dolazak delegacije u Bijelu kuću u Vašingtonu, prenosi Slobodna Evropa.
Predsjednik Kosova Hašim Tači pozdravio je potpisivanje sporazuma Kosova i Srbije u Vašingtonu.
On je na Tviteru ocijenio da se radi o istorijskom sporazumu koji je potpisan u prisustvu američkog predsjednika Donalda Trampa.
Izrazio je zahvalnost američkom predsjedniku i specijalnom izaslaniku Ričardu Grenelu na njihovom vođstvu u ovom procesu.
“Kosovo će sada nastaviti da radi na ekonomskom razvoju, radnim mjestima i daljoj domaćoj i međunarodnoj konsolidaciji”, napisao je Tači.
