Sudar "titana" u Minhenu

Sedmi put u posljednje četiri godine čeka nas deža vu u dresovima Bajerna i Arsenala. Kao da se i sama nokaut faza Lige šampiona, jednostavno, pomirila da ne može proći jedne sezone bez dvoboja njemačkog i engleskog velikana.

Iz kojih, kao po nekom pravilu, uvijek kao pobjednik izalazi gigant sa Alijanc Arene.

Znale su „tobdžije” da pobijede sada već tradicionalnog rivala u Londonu, a i u Minhenu. Međutim, uvijek su se ili kasno budili, ili prerano radovali. Zbog svega toga najava svakog proljeća ostane na najavi, jer Njemci praktično izbacuju Engleze po onoj čuvenoj Linekerovoj teoriji „Fudbal je igra u kojoj uvijek pobjeđuju Njemci”. Međutim, je li došlo vrijeme za razbijanje kombinatorike, pita se ostatak Evrope.

Anćeloti: Šanse 50-50

Iskusni italijanski stručnjak Karlo Anćeloti želi da osvoji sve sa Bajernom u svojoj prvoj sezoni. Naravno, osim Bunde slige i Kupa Njemačke, Karleto pikira novog „klempavka”, kojeg je podigao dva puta sa Milanom i jednom sa Realom.

“Čitam da smo veliki favoriti u ovom dvomeču, ali ne mislim tako. Ono što se događalo prethodnih sezona nema nikakve veze sa ove dvije utakmice koje nas čekaju protiv Arsenala. Mislim da je Arsenal odličan tim i da su šanse 50-50. Igramo večeras kod kuće i sigurno da je plan doći do pobjede bez primljenog gola. To je neka savršena varijanta, ali biće jako, jako teško, kako sada tako i u revanšu”, naglasio je Anćeloti.

Venger: Vrijeme je

Na drugoj strani, navijači Arsenala i engleska javnost već godinama traže odlazak Arsena Vengera, zbog čega je zaslužan baš Bajern, koji je nekoliko puta eliminisao Francuza u Ligi šampiona. Ali, Venger je ubijeđen da je došlo vrijeme za naplatu dugova.

“Opet smo tu, na istom mjestu u gotovo isto vrijeme i sve nam je dobro poznato. Svi sve znamo o Bajernu, njegovom kvalitetu i onom što je sposoban da uradi. Međutim, siguran sam da moji igrači posjeduju sve da pobijede Bajern i da se plasiramo u osminu finala. I ranije smo pobjeđivali Bajem, stizali na korak od prolaza dalje, ali je nedostajalo i sreće. Zato se nadam da će ovog puta i ona biti na našoj strani, jer je u Ligi šampiona sreća svakako potrebna, s obzirom na to da odlučuju nijanse”, jasan je Venger.

(dnevne novine)