(VIDEO) Neumorni Bleki iz Njivica kod Igala: Pas koji obožava da roni

Pas Bleki iz mjesta Njivice kod Igala ne samo što voli da pliva već i da roni zbog čega je i postao prava njivička atrakcija.

Omiljena igra ovog kučeta je kada mu njegov gazda Žarko Gavrilović baci kamen u more, pa Bleki brže-bolje pojuri da ga izvadi iz vode tako što zaroni, zgrabi ga zubima i plivajući iznese na obalu. Bleki je neumoran i u stanju je da vadi kamenje iz mora sve dok ne dođe vrijeme da krene kući.

Bleki u Njivicama živi već četiri godine. U tom mjestu ostavljen je još kao štene, a more, plivanje i ronjenje zavolio je uz djecu koja su se kupala na takozvanoj seoskoj plaži.

– Djeca su se zabavljala sa njim i bacala mu kamenje u vodu. Tako je naučio i da pliva i roni i da zavoli more. Sve je sam naučio. Sve vrijeme dok roni on gleda. Mješanac je, ali mislim da ima nešto i od labradora koji, inače, znaju da rone… Kad je hladno, bura, kiša, on vazda ide na more. Svaki dan. Bleki je neumoran – kaže kroz osmijeh Gavrilović.

Bleki u akciji, Foto: M. Keranović

-Kad je bio kraj ljeta, te godine kad je došao u Njivice, i kad više nije imao ko sa njim da se igra, došao je kod mene kući i tu je i ostao. I spasao se. Svaki dan  mu kuvamo hranu. Sad imamo više obaveza nego što smo ih imali prije njega. Treba ga svaki dan puštati, voditi, kupovati mu kvalitetnu hranu, kuvati. Ali kad imaš psa onda treba da ga čuvaš i voliš– dodaje za “Alo!” Gavrilović.