Golubović: Želim da zajedno gradimo Berane u kojem ćemo ponovo osjetiti duh našeg starog Ivangrada
Ivangrad nije samo ime iz prošlosti, to je duh zajedništva, solidarnosti i ponosa koji još uvijek živi u svakome od nas. Taj duh želim da oživimo i zajedno vratimo u naše Berane, jer grad nije samo mjesto, već osjećaj pripadnosti, poručio je nosilac liste „Evropski savez – SD, SDP, LP i građani – Da i tebi svane, Berane”, Radoslav Golubović.
“Ako nam ukažete povjerenje, obećavamo da ćemo raditi za grad koji poštuje svoju prošlost, ali gleda u budućnost. Grad u kojem će naši stari pričati unucima kako se nekada gradilo i živjelo s ljubavlju i trudom. Gdje će mladi imati razlog da ostanu i snove da ovdje ostvare”, istakao je Golubović.
On je upitao i da li se građani sjećaju kako su nekada ponosno govorili da su iz Ivangrada?
“Taj osjećaj želim da vratim – ponosno da kažemo “Ja sam iz Berana”. To znači grad bez rupa na putevima, gdje Lim teče čist, a naše mahale i ulice odišu životom i nadom. Grad gdje svaki čovjek zna da je važan”, kazao je Golubović.
On je kazao da obećavaju da će zajedničkim snagama graditi Berane u kojem će ponovo osjetiti duh “našeg starog Ivangrada”.
“Ne kroz nostalgiju, već kroz konkretne promjene. Da naši domovi budu puni radosti, a naš grad pun prilika za svakoga. Vrijeme je da zajedno obnovimo Berane koje nije zaboravilo svoje pretke, ali se hrabro okreće budućnosti. Hvala vam na povjerenju i vidimo se 8. decembra – jer taj dan biramo snagu Ivangrada u budućnosti Berana”, zaključio je Golubović.
