DOBRA VIJEST: Oluja “Sahara” ipak ne dolazi u Crnu Goru

Obojena kiša koja iz Sahare stiže u Evropu, prema riječima meteorologa, ipak će zaobići Crnu Goru. Umjesto toga, u našim krajevima se ponegdje očekuju padavine.

“Mi u proljećnjim mjesecima budemo izloženi značajno većim količinima saharske prašine. Ima blage saharske prašine, ali to nije ni primaći vrijednosti koje imamo u proljećnjim periodima”, kazao je CdM-u meteorolog Dušan Pavićević.

Iako je mnogi nazivaju “crvenom”, “krvavom”, “pljavom”, “obojenom”, ovakvu kišu ne razlikujemo od “obične” golim okom, barem ne dok pada. Primjećujemo je tek kada se osuši, u vidu žućkastih fleka na odjeći, roletnama, automobilima.

Crvena ili krvava kiša je meteorološka pojava koji sadrži čestice prašine crvene boje. One obično dolaze iz pustinja ili sličnih okruženja, a vruć vjetar ih nosi kroz atmosferu stotinama ili hiljadama kilometara prije nego što prašina padne na tlo.

Fenomen crvene kiše zabilježen je u februaru 1954. godine kada je žuti snijeg padao na cijelom području Crne Gore i u mnogim mjestima Srbije, kao i Bosne i Hercegovine.

Dvije godine kasnije, u junu, padala je žuta kisa u Istri, u Hrvatskom primorju i u Bosni.

Struje iz sjeverne Afrike svakog proljeća donose saharski pijesak u naše krajeve, samo što je njegova koncentracija nekada veća, a nekada manja.

Afrički pijesak pada po nama bar dva-tri puta godišnje, najčešće u proljeće a, ako je za utjehu, države koje su bliže sjevernoj Africi mnogo gore prolaze.

Tako na Kipru, nekoliko dana poslije oluje u Sahari, kada struje donesu pijesak, prašina zakloni sunce, ljudi jedva dišu, a na ravnim površinama stvara se debeo sloj najsitnijeg žutog praha.

U međuvremenu, toplo vrijeme za ovo doba godine ruši temperaturne rekorde. Tako je nedjelja, sa 18,5 stepeni Celzijusa izmjerenih u Podgorici, bila najtopliji dan Božića u posljednjih 69 godina.

Prema prognozama Zavoda za hidrometeorologiju i seizmologiju Crne Gore, u nastavku sedmice očekuje se blagi pad temperature i slabe padavine.

“Očekuje se relativno toplo, ali uz postepen blag temperature i povremenu pojavu slabih padavina. U većem dijelu zemlje slaba i povremena kiša. Susnježice i snijega biće samo u višim planinskim predjelima”, kazao je Pavićević.

www.cdm.me