POBJEDA NARODA U RUMUNIJI: Vlada POVUKLA uredbu o korupciji!

Rumuni su pobijedili!

Vlada je, nakon velikih protesta, povukla spornu uredbu kojom se dekriminalizuju mnogi slučajevi korupcije.

To je potvrdio Kalin Taričeanu, lider stranke ALDE, manjeg koalicionog partnera vladajućih socijaldemokrata, kao i rumunski premijer Sorin Grindeanu.

“Donijeli smo ovu odluku da povučemo uredbu, da je odbacimo da bi ljudi shvatili da naš cilj nije da sebe zaštitimo od pravde. Ovo se dešava zato što nemamo šta da krijemo”, rekao je Taričeanu za privatnu televiziju RomaniaTV.

Ovaj potez, prema njegovim riječima, ne znači povlačenje pred protivnicima, već pokazuje mudrost kada je riječ o interesima Rumunije.

Vlada će formalno na sjednici sjutra povući uredbu, a potom će otvoriti dijalog u javnosti kako bi se pronašlo rješenje.

Ta vijest odjeknula je na ulicama Bukurešta pa je oko 150.000 okupljenih demonstranata počelo već da slavi.

Ranije danas predsjednik rumunske vodeće partije čelnik ljevičarskog PSD-a Liviu Dragnea kazao je da bi vlada mogla da promijeni mišljenje o kontroverznom dekretu koji je uzrokovao najveće proteste u Bukureštu još od 1989. godine, tačnije od zbacivanja režima Nikolaea Čaupeskua.

On je za DC News dodao da će se sastati sa premijerom Sorinom Grindeanuom kako bi mu predložio rješenje problema.

“Moguće je da ćemo razgovarati o povlačenju dekreta ukoliko premijer na to pristane”, kazao je ranije danas Dragnea.

Kontroverzni dekret podrazumijevao je dekriminalizaciju zloupotrebe službenog položaja u kojem nastala šteta iznosi manje od 44.000 eura. Odluka bi donijela korist za desetak osuđenih korumpiranih službenika, ali i za samog Dragnea kojem se sudi za zloupotrebu položaja.

Nedugo nakon što je vijest o dekretu 31. januara došla do medija, građani su organizovali masovne proteste koji nijesu jenjavali.

Odluka je,pak, podijelila rumunsku vlast. Na jednoj strani bili su Dragnea i Grindeanuo, dok je sama vlada do te mjere bila podijeljena da su se određeni ministri u potpunosti distancirali od premijera. Štaviše, sam predsjednik Rumunije je pozvao Grindeanuoa da povuče odluku.

Vrijedi istaći da su Rumuni posljednji put masovno bili na ulicama krajem 2015. godine poslije tragičnog požara u jednom noćnom klubu u Bukureštu.

Pod pritiskom javnosti tadašnji premijer Viktor Ponta je podnio ostavku, a na ulicama je tada bilo deset puta manje ljudi nego u noći između srijede i četvrtka.